1-тӥ апрельысен воштӥськиз пиналлы нылпи сад понна тыриськон

Со йылӥз 6 процентлы. Муниципал кылдытэтъёсысь детсадъёсын тыриськон ӝутскиз 149 манетлы — 2 сюрс 515 манетозь, городъёсысь нылпи садъёсын — 224 манетлы — 3 сюрс 783 манетозь. — Тыриськонэз амалтэк йылтоно луэ, угось сиён-юонлы дунъёс ӝутско. Нош нылпиосты ческыт, тазалыклы пайда вайись сиёнъёсын сюдоно, - шуиз дышетонъя но наукая министр Римма Бякова.

Нылпи сад понна тыриськыны капчигес мед луоз шуыса, трос нылпиё семьяослы капчиятон чакламын — тыро 50 процентсэ гинэ. Со сяна, ёрмись семьяослы компенсация висъяське: 1-тӥ нылпи понна тыриськонлэн 20 процентэз берыктӥське, 2-тӥ пинал понна — 50 процентэз, 3-тӥ но со бӧрсьы нылпиос понна — 70 процентэз. Но курон пуктэмын: та компенсациез басьтон понна семьялэн адямилы быдэ доходэз улыны тупатэм (прожиточной) 1,5 минимумлэсь тросгес луыны кулэ ӧвӧл. Пусйыны кулэ, 2026-тӥ арын прожиточной минимум Удмуртиын 16 сюрс 856 манет. Со сяна, детсад понна тыриськонлэсь мозмытэмын инвалид нылпиосты будэтӥсьёс, сирота нылпиосты вордыны басьтэм опекунъёс. Нылпи садэ озьы ик дунтэк ветло, дунтэк сисько СВО-ысь ожгарчиослэн пиналъёссы.

Туспуктэм: Дышетонъя но наукая министерстволэн "ВКонтакте" бамысьтыз.