Удмуртилэн тӧроезлэн резиденцияз элькунысь устоосыз педагогъёсты ӟечкылазы

Дышетӥсьлэн нуналаз Удмуртилэн тӧроезлэн резиденцияз элькунысь устоосыз педагогъёс понна сиё-дано пумитан ортчиз.

«Мон понна бадӟым дан ӟечкыланы тӥледыз, ӧнерлыко вожвылъяськонъёсын вормисьёсты, устоосыз пӧлысь устооссэ – Удмуртилэсь данъяськонзэ. Тӥляд секыт ужды – пиналъёслы ӟечсэ пыӵатыны, соослы оскыны но котькыӵе учырын юрттыны. Куке соос асьсэлы оско, соослэн вуоное учкыны но нырысетӥ вамыш лэсьтыны кужымзы луоз. Тау тӥледлы, тӥляд ужды дунъяны луонтэм», – вераз Удмуртилэн тӧроезлэсь ужзэ огдырлы быдэсъясь Ольга Абрамова.

Пусъемъёс пӧлын Эграысь 1 номеро шор ёзо школаысь информатикая дышетӥсь Алексей Князев 2026-тӥ арын дышетон удысын азинсконъёс понна устооссэ дышетӥсьёсты премиен пусъёнъя федерал конкурсын вормисьёс пӧлы шедиз. Туэ со «Педагог года Удмуртии» конкурсын вормиз, «Учитель года России» огъяросси вожвылъяськонын «Проводник в мир знаний и идей» номинациезлэн лауреатэз луиз.

Федерал но улосвыл премиосын туэ 30 дышетӥсьёсты, педагогъёсты но наставникъёсты пусйизы. Оглом дышетон удысын 27 сюрс адями тырше.

2025-тӥ арысен дышетӥсьёслэн ӧнерлыко вожвылъяськонъёссы Росси азьмуртлэн Владимир Путинлэн пуктэмезъя быдэсъяськись «Молодёжь и дети» йӧскалык ӵектос улсын радъясько. Дышетӥсьёслы умой условиосын ужаны, азинскыны луонлыкъёс кылдытон, ӧнерлэсь данзэ будэтон ӵектослэн валтӥсь ужпумъёсыз луо.