Удмуртиын кыккылолыкъя «Билингва» центрын выль сезон кутскиз

Анай кылъёсты дышетонъя 28 площадкаос ужало Удмуртиын «Билингва» ӵектос улсын

Удмуртиын кыккылолыкъя «Билингва» центрын выль сезон кутскиз. Кык кылын вераськись 2-10 аресъем пиналъёсты но анай-атайёссэс семья пумиськонъёсы пыриськыны ӧтё. Занятиос быдэс улосвылын 28 площадкаосын радъясько. Ӵектослэн валтӥсь ужпумез – Удмуртиысь улӥсь калыкъёслэсь кылъёссэс утьыны но азинтыны луонлыкъёс кылдытон но семья кусыпъёсты юнматон.

Ӵектос улсын пӧртэм ужрадъёс ортчозы. Отын пиналъёс удмурт, бигер, пор кылъёсты шудонъёс но мастер-классъёс пыр дышетозы, вераськыны быгатонлыксэс умоятозы. Занятиосы «ВКонтакте» мерлыко вотэсысь «Билингва | Два языка - пара!» огинын гожтӥськыны луэ. Ижкарын вуоно пумиськон 1-тӥ коньывуонэ 18 час 30 минутэ Кузебай Герд нимо гимназиын но 3-тӥ коньывуонэ 10 часын Космонавтъёслэн парказы ортчозы. «“Билингва” этноязыковой центр» ӵектосэз этнокультурной дышетонъя но мерлыко кичӧлтонъёсъя «АРТЭ» центр Удмуртиысь йӧскалык политикая министерстволэн, «Удмурт Кенеш» огазеяськонлэн, Кузебай Герд нимо гимназилэн но Калыкъёслэн эшъяськон юртсылэн юрттэмзы улсын радъя. Анай кылэз но лулчеберетэз утён, пиналъёслэсь быгатонлыкъёссэс усьтон но азинтон Росси азьмуртлэн Владимир Путинлэн пуктэмезъя быдэстӥськись «Молодёжь и дети» йӧскалык ӵектослэн ужпумъёсыз луо.