Удмуртиысь Олег но Валентина Вахрушевъёс «Семья года» огъяросси вожвылъяськонын вормизы

Удмуртиысь Олег но Валентина Вахрушевъёсты «Семья года» огъяросси вожвылъяськонын вормемзы понна пусйизы

Воткаысь Олег но Валентина Вахрушевъёс «Семья года» огъяросси вожвылъяськонлэн «Семья – хранитель традиций» номинацияз вормисьёс пӧлы шедизы. Вормисьёсты пусъён ужрад 13-тӥ коньывуонэ Москваысь Кремль дворецын ортчиз. Вахрушевъёс кыназы Шаркан ёросын вордскизы. Валентина 20 ар дышетон удысын тырше, берло куать арзэ Воткаысь 44 номеро нылпи садэн кивалтэ. Ужъюртлэн валтӥсь ӧрез – удмурт калыклэсь историзэ, лулчеберетсэ но кылзэ мургес дышетон. Олег карысь объектъёсы возьма. Кузпалъёс ньыль нылъёссэс будэто. Ваньзы удмурт кылын верасько, йӧскалык лулчеберетэз гажан мылкыдэн будо.
Семьяен люкаськыса, Вахрушевъёс удмурт сиёнъёсты пӧраны ярато: перепеч, пельнянь. Татын атайзы кивалтэ. «Кылмы, йылолъёсмы, лулчеберетмы одно ик утиськыны кулэ. Нылъёслы мон котьку со сярысь верасько, со модно, со круто, со туж усто шуыса. Соос ваньзэ сое валало, асьсэос но ужрадъёсы пыриськыло. Соин ик милям та ласянь ваньмыз пӧрмоз шуыса малпасько, пичи вамышъёсын, но ми азьлань мынӥськомы», – вера Валентина Вахрушева.

«Семья года» огъяросси вожвылъяськонлэн финалаз быдэс кунысь 485 семья пыриськиз. 89-эз куать номинациосъя вормисьёс луизы. «Семья – хранитель тардиций» ӧрын 21 семьяез пусйизы. 16 семья «Многодетная семья» номинациын вормиз. Та номинацие Вотка ёросысь Чёрной гуртысь Алексей но Дарья Актыбаевъёс пыриськизы. «Сельская семья» ӧрын 12 семья вормиз. Татын Гракысь Егор но Наталья Лыбковъёслэн семьязы вожвылъяськиз. «Семья защитника Отечества» ӧрын 18 семьяез пусйизы. Таяз номинацие Удмуртиысь Алексей но Галина Макшаковъёс пыриськизы. «Молодая семья» номинациын 10 семья вормиз, номинацие Ярысь Вадим но Екатерина Ивановъёс вожвылъяськизы. «Золатя семья» ӧрын 12 семья вормисе потӥз. Таяз номинацие Каракулиноысь Валерий но Любовь Лобановъёс пыриськизы.