Удмурт блогер Лилия Широбокова «Гордость нации – 2026» VII огъяросси премилэн Приволжск федерал округъя люкетаз вормиз

Удмурт блогер Лилия Широбокова «Гордость нации – 2026» VII огъяросси премилэн Приволжск федерал округъя люкетаз вормиз

Якшур-Бӧдья ёросын улӥсь блогер Лилия Широбокова «Гордость нации – 2026» VII огъяросси премилэн Приволжск федерал округъя люкетаз вормиз. Сое «Многонациональная Россия в медиа» номинациын пусйизы.

Трос нылпиё анай, удмурт дӥськутъя но чеберъяськонъёсъя брнедлэн кылдытӥсез Лилия Широбокова «Удмурт азбар» блог нуэ. Отын со удмурт кыл, лулчеберет но сям-йылолъёс сярысь вера, гуртын улонэз возьматэ. Ӵектос кӧня ке вожвылъяськонъёсын вормылӥз ни.

«Пинал дыръям тодӥсько вал, улонэ удмурт кылэн герӟаськемын луоз шуыса. Но собере будӥ, со сярысь кӧня ке вунэтӥ. Но улон коть монэ ас сюрес вылам берыктылӥз, нош мон нош кытчы ке кожылӥ, таиз зэмзэ но мынам сюресэ шуыса малпанэн. Озьы кема кыстӥськиз, но кык ар талэсь азьло валай, бен, мынам сюресэ – со ваньмыз, мар герӟаськемын удмурт калыкезлэн кылэныз, лулчеберетэныз но азинсконэныз. Со дырысен улонэ, кызьы шуо, выль буёлъёсын ворекъяны кутскиз», – вераз Лилия Широбокова.

Оглом, огъяросси премилэн Приволжск федерал округъя люкетаз 345 куриськон вуиз. Сизьым номинациын 26 адями вормиз. Соосты пусъён Кировысь драмая театрын ортчиз.

Туспуктэм: Лилия Широбоковалэн «ВКонтакте» группаысьтыз