Калык кырӟанъя но эктонъя «Айкай» театр нырысьсэ гастролъёсын Мордовие потэ

Калык кырӟанъя но эктонъя «Айкай» театр нырысьсэ гастролъёсын Мордовие потэ

Удмуртиысь калык кырӟанъя но эктонъя «Айкай» театр Мордовие мыныны дасяське. Витетӥ арзэ со «Большие гастроли. Мы – Россия» ӵектосэ пыриське.

«Мордовие али нырысьсэ потӥськомы гастроль форматэн. Программаямы ми нуиськомы, нырысь ик, удмурт кырӟан-эктонъёсмес – вань узырлыкмес, удмурт культураез возьматыны. Собере ӟуч программа луоз на. Соин ик оскеме потэ, учкись калыклы котькуд дасям концерт площадкаын милям программамы тунсыко но кельшымон луоз», – вераз театрлэн кивалтӥсез Пётр Данилов.

«Айкайлэн» гастрольёсыз 24-31 коньывуонэ кыстӥськозы. Оглом сизьым концерт луоз: Саранск, Рузаевка каръёсын, озьы ик ёрос центръёсын.

«Большие гастроли» федерал программаез «Росконцерт» огазеяськон Россиысь лулчеберетъя министерстволэн гастрольёсъя но концертъёсъя огъяросси ужан радлыкез улсын радъя.

Таӵе концертъёс пыр адямиос удмурт калыклэн лулчеберетэныз, йылолъёсыныз, сяме пырем дунлыкъёсыныз тодматско. Со валтӥсь ужпум луэ 2026-тӥ арын, кудзэ азьмурт Владимир Путин Россиысь калыкъёслэн огъя луэмзылэн ареныз ялӥз.