«Удмуртия» издательство «Читающий мир» XII калыккуспо фестивальын вормисьёс пӧлы шедиз

«Удмуртия» издательство «Читающий мир» XII калыккуспо фестивальын вормисьёс пӧлы шедиз

Рязаньын йӧскалык книгая «Читающий мир» XII калыккуспо фестивальын «Книга года – 2026» вожвылъяськонлы йылпумъянъёс лэсьтӥзы. «Удмуртия» издательство вормисьёс пӧлы шедиз.

Книгапоттоннилэн «СВОи. Плечом к плечу» бичетэз Россиысь калыкъёслэн огъя луэмзылэн арезлы сӥзем номинациын III степенё диплом но статуэтка басьтӥз. Книгае нимысьтыз ожгар ужрадэ пыриськисьёс, соослэн семьяоссы, волонтёръёс сярысь статьяос люкамын.

«Удмуртские мифы и легенды» книгаез «За вклад в сохранение истории и культуры народов России» номинациын нимысьтыз дипломен пусйизы.

«Анай кылэз но йылолъёсты утён – элькунмылэн одӥгез валтӥсь ужпумез, “Удмуртия” издательство со уже бадӟым ватсэт пыртэ. Таяз арын гинэ ми ӝыны сюлэсь ятыр книга поттӥмы, нош Калыкъёслэн огазеяськон нуналзылы эшшо кӧня ке книгаен тодматыны дасяськиськомы», – вреаз «Удмуртия» издательстволэн кивалтӥсез Юрий Кузнецов.

Оглом вожвылъяськонэ 34 улосвылъёсысь 68 издательствоос 180 книгаен пыриськизы.