Ижкарын пусъёзы Калыкъёслэсь огазеяськон нуналзэс но Удмуртилэсь кунлыксэ

Ижкарын пусъёзы Калыкъёслэсь огазеяськон нуналзэс но Удмуртилэсь кунлыксэ

4-тӥ шуркынмонэ, Калыкъёслэн огазеяськон нуналазы но Удмуртилэн кунлык нуналаз, Ижкарын элькунлы кутскон сётӥсьёслы синпелетъёс доры сяськаос понон, вӧсяськон но киросэн вамыштон но концертъёс радъяськозы. Со сярысь журналистъёслы Удмуртиысь йӧскалык политикая министрлэсь ужзэ быдэсъясь Эдуард Петров но «Центр активных коммуникаций» ужъюртлэн кивалтӥсез Евгения Сундукова веразы. Сиё-дано ужрадъёс 3-тӥ шуркынмонэ кун приёмен Калыкъёслэн эшъяськон юртазы кутскозы, кудзэ Удмуртилэн тӧроезлэсь ужзэ огдырлы быдэсъясь Ольга Абрамова ортчытоз. Отын ялозы Элькунлэн данъян пул вылаз пыртэм адямиослэсь но коллективъёслэсь нимъёссэс.

Озьы ик кун приём дыръя тодмо луоз Удмурт Элькунлэн кун премиезлэн выль лауреатъёсыз. Устооссэ сизьым ӧръёсъя пусъёзы. Туэ премиез 16 коллектив басьтоз. 4-тӥ шуркынмонэ ужрадъёс кутскозы Свято-Михайловской соборын.

Литургия кутскоз 8 час 30 минутэ. Собере мыноз крестный ход Шор площаде, татын концерт луоз. Концерт дыръя Удмурт Элькунысь азьветлӥсьёслы, основательёслы Иосиф Наговицынлы, Трокай Борисовлы, Кузебай Гердлы сяськаос понозы.

Нырысьсэ бесерман крезьёс чузъяськозы симфони оркестр шудэм улсын, нош быдэстозы соосты «Айкай» театр.

Со сяна, куд-ог тодмо удмурт кырӟанъёс ӟуч кылын чузъяськозы. «Милемыз, удмуртъёсты, Россиын улӥсь вань калыкъёс милемыз мед валалозы шуыса», пусйиз Евгения Сундукова. Ӟуч кылэ берыктӥзы, кылсярысь, «Чагыр, чагыр дыдыке» но «Ой, тӥ, чебер нылъёс» кырӟанъёсты.

«Нимысьтыз саклык висъямын луоз удмурт кырӟанъёслы. И татын ми возьматомы, уйпал удмуртъёслэн ас кырӟан сямзы вань, лымшор удмуртъёслэн – асьсэлэн кырӟанъёссы, Татарстанын яке Башкириын улӥсь удмуртъёслэн асьсэлэн кырӟан манерзы вань шуыса. Вот таӵе бадӟым аспӧртэмлыко концерт, кудзэ огазеялоз сыӵе удмурт возь, кытын пӧртэм пумо сяськаос будо, и котькуд калыкез ми возьматомы сяська пыртӥ. Удмуртъёслэн со италмас сяська, ӟучъёслэн – ромашка, мукет калыкъёслэн – мукет. Со сяськаос будозы, возьматэмын луозы сцена вылын но», вераз Евгения Сундукова, «Центр активных коммуникаций» ужъюртлэн кивалтӥсез.